வாழ்வின் விளிம்பில் முதுமை

முதுமை என்பதொரு மூன்றெழுத்து
முடிவை நெருங்கும் கடையெழுத்து
இறந்த காலங்கள் இன்பமாயிருக்கும்
வருங்காலமோ கேள்விக்குறியாகும்.

வாழ்ந்த காலங்களின் வசந்தங்கள்
விழியோரக் கதைகள் சொல்லும்
வாழும் வாழ்க்கையின் நிச்சயமின்மை
விழியோரங்களில் நீர் வடிக்கும்

தேர்ந்தெடுத்த துணையோ
பெற்றெடுத்த மகவோ
சுற்றி நிற்கும் சுற்றமோ
சொந்தமற்றுப் போகும் நேரம்.

சேர்த்து வைத்த ஐஸ்வரியம்
அர்த்தமற்றுப் போகும் நேரம்
செல்லாக் காசாய் ஒடுங்கி இங்கே
செல்லரிக்கப் போகும் தேகம்

மீண்டு வந்து வாழ வேண்டுமென்று
மெளன யாகம் ஆங்காங்கே
மீண்டு வர வழிதெரியாத
மெளன சாட்சியான உயிர் இங்கே.

போகும் நேரம் தெரிந்துவிட்டதென்று
புன்சிரிப்பால் உணர்த்திவிட்டு
பொங்கியழும் உறவுகளைப் பிரிந்து
பறந்து செல்லும் இன்னுயிர் ஒன்று!

(எல்லா மரணங்களும் ஏற்படுத்தும் பாதிப்பு-
அது எவ்வளவு முதிய வயதாக இருந்தாலும்)