காதலா.. காதலா!

``தேடி அலைகிறேன் – உன்
தேய்ந்த செருப்பின் சுவடுகளை
பார்த்துக் களிக்கிறேன் – உன்
பாதம் பதிந்த பாதைகளை

எழுதிக் கிழிக்கிறேன் – உன்
நினைவு தொட்ட எண்ணங்களை
பதறித் துடிக்கிறேன் – உன்
பார்வை பட்ட தருணங்களில்

வீம்புக்கு சண்டையிடுவேன்– உன்
விழியசைவில் சரணடைய
காரணமின்றி கடுப்படிப்பேன் – உன்
கரங்களில் என்னை அர்ப்பணிக்க”.

இப்படியெல்லாம் எழுதியிருக்கிறேன்
இளமை எனும் ஊஞ்சலாடியபோது
இன்னும் என்னென்னவோ கிறுக்கியிருக்கிறேன்
இதயத்தில் நீ மட்டுமே இருந்தபோது!
( இப்போதும் இதயத்தில் நீதான்- ஆனால்
இல்லற இடிபாடுகளிடையே நீ!)